WANGUN PAAJAH-AJAHAN BASA BALI SAJERONING ACARA SEKAR TAMAN RARE RING RADIO GENTA SWARA SAKTI BALI

Abstract

Tetilikan puniki mahbahang indik (1) wangun paajah-ajahan basa Bali sajeroning acara Sekar Taman Rare miwah (2) paiketan wangun paajah-ajahan basa Bali sajeroning acara Sekar Taman Rare ring wangun paajah-ajahan sakadi inucap ring sekolah manut Taksonomi Bloom. Jejering tetilikan puniki inggih punika acara Sekar Taman Rare ring radio Genta Swara Sakti Bali. Panandang tetilikan puniki inggih punika wangun paajah-ajahan sajeroning acara Sekar Taman Rare. Sepat siku-siku sane kanggen sajeroning tetilikan puniki inggih punika (1) teori Taksonomi Bloom, (2) konsep tembang, (3) konsep anggah-ungguhing basa Bali, miwah (4) konsep nilai pendidikan karakter. Kramaning tetilik sane kanggen marupa kramaning dokumentasi miwah kramaning sadu wicara. Data tureksa sane kamargiang inggih punika pangresikan data, panyorohan data, pangwedaran data, miwah panyutetan. Pikolih tetilikan puniki marupa (1) wangun paajah-ajahan basa Bali sajeroning acara Sekar Taman Rare sane kapaiketang ring tetujon pendidikan manut Taksonomi Bloom inggih punika saking wangun kognitif, afektif, miwah psikomotor. (2) Paiketan wangun paajah-ajahan sajeroning acara Sekar Taman Rare ring wangun paajah-ajahan sakadi inucap ring sekolah minakadi paiketan sajeroning materi paajah-ajahan sane kadasarin antuk wangun kognitif, paiketan sajeroning nilai pendidikan karakter sane kadasarin antuk wangun afektif, miwah paiketan sajeroning kawagedan matembang miwah mabebaosan sane kadasarin antuk wangun psikomotor.

Kruna Jejaton: basa Bali, wangun paajah-ajahan